هي أكلة شعبية، عرفت في قديم الزمان وما زالت إلى الآن، وتنتشر في مناطق البلقاء، وهي أكلة زاكية بتنحط مع وجبة الفطور والعشاء.

المكونات: 2 ك باذنجان, أوقية جوز, رأس ثوم, زيت زيتون, فلفل حار, شطة حسب الرغبة.

الطريقة: أول شي نشتري باذنجان بلدي يكون الحب صغير، وبعدين بنحطهن بجاط وبنشيل القمع، بعدين بنغسلهن بالمية وبنغطيهن بصحن معبا مي عشان يظل الباذنجان نازل في المي وما يطفو على السطح، وبنحطهن على النار وبس تغلي المية بنطفي الغاز وبنزلهن، بعدين بنصفيهن بالمصفاية ونتركهن حتى يبردن، بعدين بنفتحهم من النص وبنفس الوقت بنحافظ على شكلها، يعني لازم يكون متماسك من الجهتين، وبنتركهن بالمصفاية حتى يصفوا مليح، وبنخليهن يوم كامل، وبعدين بنجهز الحشوة، بنقي الجوز وبنفرمه فرمة ناعمة كثير، وبعدين بنقشر الثوم وبدقه وبنخليها مع الجوز، وبنحط شوية زيت زيتون، وإذا بدنا بنحط الفلفل والشطة، بعدين بنحشي الباذنجان، وبنرتب حبات الباذنجان بمرطبان وبنغمره بالزيت وبنسكر مليح وبنتركة 10 أيام حتى يخمر مليح، وأكثر شي بنعمل المكدوس بالخريف، يعني موسم الزيت، وبظل للشتاء.